Wolfgang Schöner

‘Fysikkimi nunalerinermilu Graz Universitetimi professoriuvuna, silap pissusaata allanngoriartornera qaqqaqarfinnullu sunniutai ukkataralugit. Suliniummi Snow2Rain-mi aqutsisuuvunga. Suliniut Østrigimi Issittumi ilisimatusarnermi Institutimeersunit (APRI), ilisimatusartunit eqimattakkaanit marlunnit aallarnisarneqarsimavoq.

Wienip Universitetiani Innsbruckimilu nunalerineq silasiorneq geofysikkilu ilinniagaqarfigereerlugit 1991-mi Wienip Universitetiani Silasiornermut Geofysikkimullu immikkoortortaqarfimmi ikiortitut sulilerpunga. 1995-mi Østrigimi silasiornermut institutimut, Central Institute for Meteorology and Geodynamics (ZAMG), nuuppunga tassaanilu silap pissusaanut ilisimatusarneq sermersiornelu aallutilerlugit, pingaartumik Sonnblick Observatoriemi (Østrigimi alpit). Ukioq taanna aamma ph.d.-mut ilinniarnera naammassivara, sammisarisimallugu alpini qutsissuni, ukiup ingerlanerani piffissani aalajangersimasuni mingutsitsinernit aputit ulinneqartarneri. 2009-mit 2014-mut ZAMGmi ”Silap pissusaata sunniutat pillugit immikkoortortaqarfimmi” aqutsisuusimavunga Sonnblick Observatoriemilu pisortamut tullersortaasimallunga. Qaqqat pillugit ilisimatusarnerup saniatigut issittumi silap pissusaanut iigartartullu allanngoriartornerinut ilisimatusarnerit soqutigisaraakka. 2007-mit 2009-mut Østigi nunat tamalaat akornanni issittumut ukioritinneqartumut peqataasimavoq, Andreas Richterilu Wienip Universitetimeersoq peqatigalugu Østrigip tapersiissutaa ataqatigiissaarsimavara. 2014-mi Graz Universitetimi professorinngortinneqarpunga. Maannakku Østrigimi issittumi ilisimatusarnermut instituttimi pisortaavunga.’